塞爾特人形勢大利

（無綫明珠台及now 670周三早上9時直播）

湖人中鋒拜林今場帶傷上陣，但打咗32分鐘僅攻入6分，而且得一個籃板，明顯唔在最佳狀態，雖然湖人主將高比拜仁發揮水準，全場取得38分，包括4個三分波，但其他隊友唔爭氣，高比仔亦獨力難支。

湖人（紫衫）同塞爾特人球員爭奪籃板各不相讓，構成呢張精彩圖片。 （美聯社圖片）

湖人敗走波士頓，高比頭耷耷離場。 （美聯社圖片）

皮雅斯27分搶鏡

反觀塞爾特人發揮相當平穩，佢哋今仗贏波關鍵係防守非常出色，除高比拜仁外，湖人其他球員起手都相當困難，加上「綠軍」小前鋒皮雅斯表現搶鏡，獨取27分，而朗度、加納特亦交到貨，即使射手雷阿倫嘅三分波繼續失靈，但最終仍以6分之差擊敗湖人。

塞爾特人贏咗呢場後，形勢相當有利，因為NBA總決賽歷史上，當打和2比2後，贏到第五場嘅球隊，奪冠機會達76％，而總決賽改為2-3-2賽制後，只有兩支球隊能夠喺落後2比3嘅情況下奪冠，一隊係八八年嘅活塞，另一隊係九四年嘅火箭，故湖人形勢相當不利。

■本報綜合報道