荷蘭熱浪衝散丹麥
昨晚世界盃E組分組賽開打，勁旅荷蘭即使有「魔翼」洛賓缺陣亦冇有怕，憑本屆大賽首個「烏龍波」，再加上古積特執死雞，以二比○輕取丹麥全取三分，打開分組賽勝利之門！荷、丹之戰，比之前幾日增添了不少年輕女球迷入場，甚至有人舞獅，令現場氣氛立即升溫，荷蘭球迷更將球場染成一片橙色，大大增添了「全能兵團」的氣勢。
強陣出擊 僅洛賓倦勤
荷蘭今場強陣出擊，除左翼洛賓因傷缺陣外，中場史奈達、雲達華治、古積特全部出齊，前線以尹佩斯領銜攻堅，面對丹麥自然被睇高一線。但丹麥打穩守突擊有板有眼，古積特、雲達華治雖有射門，卻全部無功而還；反而丹麥反擊更具威脅，羅美度右路勁抽、卡倫保入楔左腳勁射，可惜過不了「橙軍」門將史基倫堡十指關。
但下半場開賽一分鐘，荷蘭就憑一個「烏龍波」領先。尹佩斯左路高波傳中，丹麥後防西蒙保臣頭槌解圍，但皮球卻撞正隊友丹尼爾艾格背脊彈入己隊大門，荷蘭憑烏龍球領先一比○。
靠烏龍波領先 古積特埋齋
丹麥輸個冤枉波後士氣低落，而且老將如羅美度、干查、佐真遜體力不繼，之後時間全屬荷蘭天下，雖然雲邦美、史奈達射門都未能建功，但八十五分鐘終於拉開比數，後備艾利亞射門中柱，古積特趕到執雞成功射成二比○完場。荷蘭分組賽首戰表現對辦，打出爭標分子水準。
■本報綜合報道