綠軍破湖人主場金身
塞爾特人「三巨頭」在今季季後賽輪住發威，繼加納特及皮雅斯後，尋日就到雷阿倫大開「Ray Gun」機關槍掃射湖人！佢單喺上半場已轟入7個三分球，打破「波神」米高佐敦嘅舊紀錄，結果就係憑佢準繩射術，加上朗度打出NBA總決賽七年來首個「三雙」，協助「綠軍」以103比94擊敗湖人，打破「紫金兵」今季季後賽主場不敗身！
綠軍喺次圈淘汰騎士靠晒加納特，到東岸決賽就有皮雅斯發威，估唔到總決賽，就輪到雷阿倫顯身手！「Ray Gun」今場甫開賽已着火，單喺上半場8度施射三分球中7球，打破米高佐敦在92年總決賽對拓荒者時，上半場射入6球嘅舊紀錄。
朗度「三雙」追和1:1
眼見雷阿倫着晒火，湖人下半場亦向佢加強防守，而「Ray Gun」亦改變打法，主力引開對手協助隊友得分，其中朗度就獲益不少，單喺第四節上場後就連得10分，在尾段助塞軍鎖定勝局，總成績追成1比1平手。
雷阿倫全場攻入32分，三分球11投8中，刷新總決賽三分球紀錄，此前分別有三位球員在總決賽單場入過7球，包括雷阿倫在08年嘅紀錄在內。至於朗度同樣打出身價，全場攻入19分、12個籃板及10個助攻，自03年鄧肯後，首次有球員在總決賽打出「三雙」。總決賽第三回合將會明早上演，輪到「綠軍」主場。
■本報綜合報道