彩虹國7色景點

好望角食南極風

去南非必會去好望角，好多人細細個就聽呢個名。好望角英文係Cape of Good Hope，係葡萄牙航海家於1497年從歐洲繞過呢度到達東方，跟住當時嘅葡萄牙國王約翰二世認為，繞過呢個海峽後建立起嘅海上航線為葡國帶來希望，為呢個海灣取名為好望角。

角點燈塔過百年歷史

好望角位於開普半島的南部，有懸崖及沙灘等，好望角長期都好大風，以前亦叫風暴角。好望角對上海拔238米有一個懸崖叫角點（Cape Point），或者開普角，遊客可以坐纜車上去。角點有一座建於1857年嘅燈塔，以前經常有介紹話角點係非洲大陸最南端，係大西洋同印度洋嘅分界線，但其後經測定，係角點以東一百五十公里嘅厄加勒斯角先啱。

桌山畀上帝開飯

開普敦嘅標誌係桌山（Table Mountain），桌山高1067米，山頂好似被刀砍去一半咁，平坦得好似一張枱，所以就有呢個名。傳說話桌山係上帝食飯嘅大餐桌，每年夏季大量水氣喺桌山聚集，形成雲團將桌山包圍時，當地人形容為上帝鋪好枱布開飯喇！

登山吊車360度轉

以大型吊車上桌山，吊車會一邊上升一邊360度轉，上到桌山頂可以睇晒整個開普敦，四邊包括好望角、曾經拘禁過黑人政治領袖曼德拉嘅羅本島、國家植物公園等等。

黃金礦城玩遁地

黃金礦城係一個建築喺廢置金礦嘅主題公園，一般機動遊戲當然唔足以吸引遊客，呢個公園最大賣點係可以跟以前喺度做過工人嘅導賞員，搭以前用過嘅升降機，深入地底226米下嘅礦洞，了解當時嘅採金過程及工人生活。樂園內另有熔金及鑄造金磚過程示範，係深入了解當地工人生活嘅好地方。

聯合大廈見證政權變遷

比勒陀利亞係南非行政首都，大部分政府機構及各國使館都集中喺呢個城市，當然，總統府亦位於呢度。總統府及南非政府位於聯合大廈，大廈由花崗岩建成，而且設計如古希臘建築物一樣，大廈前有個大公園，園中有唔同紀念碑同雕像，見證住南非政權嘅變遷。

比林斯堡動物園探Big 5

去南非當然唔可以錯過睇野生動物，由於比林斯堡野生動物保護區喺太陽城附近，大部分遊客都會順道去埋。南非「Big5」獅子、花豹、犀牛、大象及水牛都喺齊呢度，仲有長頸鹿、跳羚、角馬同河馬等，當大朝早未天光就出發，對眼未撐得開時，突然喺你面前出現呢啲野獸，你一定會成個醒晒。

太陽城森林王宮

太陽城係一名南非富翁嘅瘋狂構思，佢一直希望喺非洲叢林建造一個好似拉斯維加斯嘅娛樂中心。太陽城於1978年動工，一年後呢個以中非太陽谷傳說為藍本嘅度假區就開幕。位於約翰內斯堡西北方187公里嘅太陽城，擁有全球十大酒店之一嘅迷城王宮、大型水上樂園及高爾夫球場等，曾經有三屆世界小姐選舉都喺呢度舉行。

博物館親歷種族隔離

種族隔離博物館係約翰內斯堡以至南非最著名嘅博物館，博物館於2001年開放，館前有七根石柱，寫住自由（Freedom）、尊重（Respect）、責任（Responsibility）、多樣（Diversity）、和解（Reconciliation）、平等（Equality）及民主（Democracy）。

設兩個入口予不同種族

博物館設有兩個入口：白人及非白人，兩種門票將參觀者分為兩類人，從不同入口進入，要遊客感受呢種種族隔離嘅基本含義。兩條通道最後匯合進入館中，介紹南非從1948年到1994年，實行種族隔離政策的生活面貌、不公平的情況和如何最終抗爭勝利嘅歷程。