薛高貼巴西6奪世盃

世界盃逼近,巴西足球名宿「白比利」薛高亦專程來港湊熱鬧,在香港觀塘apm現身出席活動。問到今屆世盃爭標形勢,薛高表示對巴西領隊鄧加有信心,認為森巴兵有力壓倒德國、意大利同阿根廷等勁敵,第六次捧走世界盃。

對鄧加充滿信心

薛高曾於七八、八二及八六年三度率領巴西角逐世界盃,亦於上屆世界盃以領隊身份帶領日本參戰,離開日本後一度執教土耳其球會費倫巴治,至兩年前辭職回復自由身至今,世界盃期間他先會到南非出席開幕禮,之後返回巴西睇波。昨日活動所見,這位一代球星身形發福不少,雖然挺着大肚腩,但腳法依然出色,商場活動期間多次表演控球技術,吸引市民圍觀。

球王比利向有烏鴉口稱號,貼嗰隊死嗰隊,不過白比利薛高就冇有怕,向傳媒大談世界盃心水,首先他睇好自己祖國巴西,他說:「巴西曾五度奪得冠軍,我覺得最開心是第一次捧盃,而今屆巴西亦很有機會,領隊鄧加執教三年,成績甚佳,雖然朗拿甸奴落選,但我們應該信任鄧加的判斷。」

最大勁敵係德意

講到巴西的最大對手,薛高先提到德國及意大利,然後是死敵阿根廷,他說:「德國及意大利每到世界盃都有好表現,不容忽視,而阿根廷亦是重要對手,因為他們擁有美斯。」

另外,世界盃期間,商場內都會有轉播,亦設有豪華的「薛高之家」讓球迷觀戰,市民只要購物及捐款予救世軍,都可獲招待在商場內觀戰。

薛高Profile

國籍:巴西

年齡:57歲

綽號:白比利

國家隊上陣紀錄:72場入52球

曾効力球會:法林明高、烏甸尼斯、鹿島鹿角

曾執教球會:鹿島鹿角、日本國家隊、費倫巴治、賓約哥、莫斯科中央陸軍、奧林比亞高斯

簡介:薛高係比利之後最天才橫溢嘅巴西球員,曾經出戰78、82及86年三屆世界盃,可惜三次俱無功而還,其中86年八強對法國時射失12碼更成為職業生涯最大遺憾。薛高退役後,巴西先後於94及02年捧盃,故亦被視為最冇世盃緣嘅巨星之一。