湖人博到進攻犯規獎400
萬眾期待的NBA總決賽今晨開打，爭取衞冕的「紫金兵團」湖人，為求一雪前恥擊敗宿敵塞爾特人，再出奇招激勵球員，湖人管理層發出特別獎賞通知，只要球員每令對手製造到一次進攻犯規，就可袋走50美元（約400港元），實行做到每分每秒都有「金」執。（高清翡翠台、now 670及有線165台今晨9時直播）
由防守到製造進攻犯規都並非「紫金兵團」的強項，為了針對這個弱點，湖人管理層開出上述條件，積遜教練表示：「希望能激勵他們在比賽中打得更強硬，讓比賽充滿身體接觸。」
至於湖人後衞胡查錫也表示：「這將激勵我們去製造進攻犯規，但也要避免自己陷入犯規麻煩。」當然有獎就有罰，這些獎金主要來自球員過往的罰款，而大部分款項都來自奧當！
奧當大懵老婆有咗都唔知？
講起奧當，未知是否專心備戰，竟然連老婆是否「有咗」都唔知，認真大懵！奧當個老婆Khloe Kardashian是「明星仔」，他倆私生活亦頻頻見報。最近美國傳媒大爆Khloe有咗兩個月身孕，對於記者追問，奧當即時O嘴：「有咗？我唔肯定喎！如果佢有咗我應該係第一個知嘅喎！」
雖然奧當懵盛盛連老婆係咪「大肚」都唔知，但查實他很愛錫家人，兩年前湖人去波士頓打總決賽，囝囝被主隊fans嘲笑，為免屋企人再受球迷騷擾，奧當已勒令Khloe唔睇作客波，絕對是廿四孝好老公！
本報綜合報道