三巨頭戰高比仔
2010年NBA總決賽湖人對「綠軍」塞爾特人，明早正式開打！湖人前季在「夢幻決賽」以2比4不敵塞軍，「紫金兵團」當然希望一雪前恥，擊敗宿敵成功衞冕。高比拜仁賽前表示，取勝關鍵在於「鎮定」。若然高比仔能夠如願擊敗「綠軍」，其職業生涯將會變得完美。（高清翡翠台、now 670及有線165台周五早上9時直播）
兩支NBA史上最偉大球隊湖人及塞爾特人，繼08年後再一次在總決賽碰頭，此前兩軍曾11次在決賽碰面，塞軍壓倒性地贏出9次，湖人只於八十年代期間，藉魔術手莊遜領軍下兩勝塞軍。此外，兩軍在NBA史上奪冠次數最多，湖人曾15次奪得總冠軍，而塞軍更優勝，坐擁17台總冠軍獎座。
高比仔：最緊要鎮定
回顧前季賽事，塞軍初組加納特、雷阿倫及皮雅斯的「三巨頭」威力無比，在總決賽以4比2擊敗湖人，其中最關鍵一戰在於第4回合，當時湖人擁主場之利，一度領先24分之下竟失掉賽事，成為整個系列賽嘅致命傷，難怪高比仔賽前亦表明要鎮定比賽：「重遇塞爾特人冇乜特別，只係我哋會吸取之前嘅教訓，我覺得關鍵在於鎮定。上季球隊表現非常鎮定，忘記之前嘅失敗而奪得冠軍。」至於塞軍主帥李華士就認為，擊敗湖人向來係塞軍使命，球員肯定會較之前賽事更肉緊。
高比仔14年職業生涯中，曾4奪總冠軍，常規賽MVP、季後賽MVP、明星賽票王，甚至奧運金牌都已攞過，成就早已滿瀉，唯一令高比仔遺憾，就係未能在決賽舞台上擊敗宿敵塞爾特人奪冠，所以只要高比仔能夠衝破埋「綠軍」嘅魔咒，職業生涯堪稱完美。
本報綜合報道