【本報綜合報道】雖然塞爾特人上圈成功淘汰魔術，但「綠軍」亦要付出唔少代價，皮雅斯、朗度、拉舒華萊士、柏堅斯同東尼阿倫都受傷，格連戴維斯同馬基斯丹尼奧斯更出現腦震盪，幸好塞爾特人喺總決賽前有五日休息，教練李華士更率先放球員兩日假，希望加快傷兵復原速度，健健康康迎接總決賽。
塞爾特人主將皮雅斯話五日嘅休息時間嚟得好合時：「我之前受過幾次傷，依家可以好好治療，好似腳傷、背傷等，希望叉足電之後，總決賽可以有好表現。」
不過，教練李華士就擔心拉舒華萊士嘅傷勢：「拉舒華萊士背傷好嚴重，依家連行都有問題，佢同格連戴維斯上場表現都麻麻，好彩依家我哋有嘅係時間，我覺得去到星期五，一切都會轉好。」