鳳凰城福祿壽大爆發

鳳凰城太陽上場變陣以聯防應付湖人強攻，結果獲得大成功，教練根特利今場當然照辦煮碗，繼續在主場聯防守湖人。事實證明戰術繼續奏效，逼得高比仔要多番單打獨鬥抗聯防，不過主隊一眾後備兵確實大勇，第二節陸續落場後，為球隊拉開10分領先優勢。

拿殊A米變配角

去到第四節，教練根特利眼見幾位後備兵着晒火，索性唔派拿殊及「A米」上陣，關鍵時刻繼續重用後備抗湖人主力。結果巴布沙、菲爾及杜利連番遠射得手，開節已打出一段14比5攻勢，及後再有達基斯單挑費沙爆籃得分，將球隊士氣拉至頂點，最終鳳凰城就係憑後備兵大爆發，K.O.湖人一眾大牌球星。

高比拜仁寫個服字

菲爾、巴布沙及杜利今場用「三分雨」射死湖人，三人後備落場後合共射入九個三分球，命中率達到五成。至於另外兩員後備阿蒙臣及達基斯，雖然得分唔及頭三位，但阿蒙臣上陣17分鐘搶得七個籃板，而達基斯上陣18分鐘貢獻八次助攻，表現同樣無懈可擊。

根特利賽後表示：「我向來都信任我每一位球員，不過我一直以為後備球員防守上比較出色，估唔到佢哋進攻都咁堅！」今場豪取38分及10次助攻嘅高比拜仁亦甘拜下風：「佢哋嘅板櫈力量實在太強。」鳳凰城追成2比2平手後，第五回合將會在周五重返洛杉磯上演。

■本報綜合報道