鳳凰城後備能夠打贏「紫金兵團」嘅豪華陣容，的確唔嘢小！要知道呢五位「福祿壽」菲爾、巴布沙、阿蒙臣、杜利及達基斯，合共年薪僅為1260萬美元，相反湖人單係一個高比仔，年薪已超過2300萬美元，一個夠養九個，呢班後備都算打破平嘢冇好嘅定律。
其實鳳凰城呢班平價後備，已經唔係第一次喺今季季後賽爆發，喺上一圈對馬刺時，因部分主力在關鍵第三戰同樣手風欠順，結果斯洛文尼亞國手達基斯單喺第四節已轟入23分，而一眾後備兵則合共攻入48分，協助太陽贏得上圈最重要一仗，最終亦橫掃對手出線。
經過今役之後，相信呢五位後備兵均聲名大噪，尤其係二年生達基斯，呢位外援今季已被譽為拿殊接班人，而佢亦來頭不小，未登陸ＮＢＡ前曾領斯洛文尼亞奪得Ｕ20歐洲錦標賽冠軍，亦曾成為斯洛文尼亞聯賽最佳新秀及到西班牙聯賽打滾。