魔術追番場未斷氣!
魔術未斷氣！東岸決賽連輸三場，吊緊鹽水嘅魔術尋日憑「魔獸」杜域侯活爆發攻入32分，而拍檔尼爾遜亦告回勇在加時射入兩記關鍵三分球，力挽狂瀾下助魔術作客以96比92擊敗「綠軍」塞爾特人，總成績追貼至1比3，避免連輸四場尷尬出局。
NBA歷史上，從未有一支球隊喺7場4勝制下，落後0比3可以後來居上出線！魔術尋日背水一戰，開賽後已拋開包袱搶攻，三大主力杜域侯活、尼爾遜及劉易斯嘅精神面貌均大有改善，只係「飛人」卡特仍未重拾手感，魔術首節過後領先5分。
尼爾遜連入三分波奠勝
擁主場之利嘅塞爾特人第三節加強防守，逼得魔術在最後4分鐘攞唔到分，完節後更反先1分。可惜綠軍喺第四節剩餘十多秒時浪費絕殺機會，結果將比賽帶入加時。加時階段成為魔術天下，尼爾遜連入兩記三分拋開比分，最終魔術激戰下以96比92擊敗綠軍，總算保留一線希望。
魔術多名主將今場大打爭氣波，雖然首領杜域侯活仍飽受犯規次數困擾，但仍轟入32分、搶得16個籃板球及造出4次封阻。至於踏入東岸決賽後，一直備受抨擊嘅尼爾遜亦打出代表作，攻入23分交出6次助攻。「魔獸」賽後表示：「大家都知球隊已無退路，我哋唔想咁快執包袱，所以要奮戰下去，未到最後一刻都唔可以放棄！」兩軍周四會重返奧蘭多賽第五回合。
本報綜合報道