魔術變陣誓破塞軍

貴為東岸二號種子嘅魔術，竟連失兩場主場，落後塞軍0比2，表現確令人大失所望。在NBA季後賽歷史上，賽事若以七場四勝制分勝負，只有14支球隊能夠喺落後0比2下反勝出線，而連輸頭兩場主場嘅球隊，更只得3隊能起死回生，所以魔術形勢可謂極之危殆！

皮雅斯頭兩場手風順

不過，魔術仍未氣餒，領袖杜域侯活更向外表示，隊友們仍深信可以出線總決賽，現時士氣高漲，希望明早可以追回一仗。教練雲根迪賽前亦重新部署戰術，打算用首兩戰上陣時間較少嘅班尼斯，專責盯緊皮雅斯，務求減低佢起手次數，皮雅斯近兩場分別獲得22及28分。班尼斯表示：「教練問我守唔守得住皮雅斯，我即刻充滿信心咁答冇問題，我的確有方法盡量減低佢嘅速度。」

事實上，班尼斯在職業生涯中，大多被教練委任緊纏對方主將，佢近年都多番負責凍結如高比拜仁、韋迪及勒邦占士等得分能手，相信班尼斯嘅防守表現，將成為明早勝負一大關鍵。此外，不少專家亦認為，魔術今場必須盡早入局，因為近仗都係初段大落後，成為致命傷。

■本報綜合報道