【本報綜合報道】自從騎士被塞爾特人擯出局，「大帝媽」又同騎士嘅韋斯爆出孽戀醜聞，「大帝」勒邦占士已計劃夏天離開騎士。日前ESPN記者亦證實，占士在出局後，曾致電公牛領袖戴歷羅斯，表示非常期待與羅斯仔合作，準備接「波神」棒復興公牛王朝。
今次消息係由ESPN記者史葛柏積遜發放，據悉占士向來欣賞戴歷羅斯嘅打法，所以特意致電了解公牛情況，睇吓值唔值得加盟呢支叱咤九十年代嘅球隊。不過，唔少美國傳媒估計，其餘球星如韋迪及保殊等，都會陸續收到占士電話，所以占士現時正衡量自己嘅去向，未必一定轉投公牛。
《紐約郵報》日前就為占士去向列出賠率，若然離開騎士嘅話，加盟紐約人機會最大，賠率為8倍，公牛則以9倍緊隨其後。至於另外兩大熱門落腳地熱火及籃網，就分別列為19及21倍，不過最熱嘅始終係留喺騎士，專家認為機會率為二分一。