負傷率湖人撼鳳凰城 高比頂硬上！

自湖人淘汰爵士晉級後，高比拜仁同拜林已缺席多課操練，高比仔右膝仍感到痛楚，但日前亦開始作簡單練習，而中鋒拜林半月板輕微撕裂，至今仍未復操，不過積遜已打算明日一戰派兩人上陣。

高比仔認為上圈直落四比○擊敗爵士，令佢得到充分休息：「今季一直受傷患困擾，但經過一星期時間休養，我已經調整過來。」至於拜林嘅膝頭仍然腫脹，不過佢仍打算喺決賽紮住上陣，力保湖人籃下實力。

積遜出口術跣拿殊

至於取勝之道，湖人前鋒奧當認為最緊要係守住太陽嘅三分球攻勢：「太陽進入季後賽可以話脫胎換骨，佢哋特點係外圍投射準繩，所以我哋必須限制佢哋第二次進攻嘅機會。」

此外，積遜教練早前打心理戰，投訴拿殊經常走步，但拿殊卻指「最佳教練」馬刺嘅普波維治都冇話過佢，擺到明寸積遜冇料到。