【本報綜合報道】雖然公牛、籃網、湖人等球會都想招攬大帝，不過紐約人始終係大熱之選，事關喺紐約呢個大城市可完全發揮勒邦占士嘅商業價值，依家紐約周街都貼住「歡迎占士」嘅海報，荷里活導演史碧奇李昨仗亦「破天荒」轉捧塞爾特人：「作為紐約人忠實擁躉，我冇可能鍾意『綠軍』，但我知道只要騎士被淘汰，占士就會嚟紐約！」
紐約人為占士轉球衣款色、起新球場，整個紐約依家掀起「大帝熱」，全城最大型嘅男士俱樂部SCORES NY日前宣布，若果占士加盟紐約人，佢可以終生免費「享用」佢哋嘅脫衣舞孃，等班囡囡為佢跳膝上舞，同時定期舉行「占士之夜」，要脫衣舞孃着住佢件波衫表演，到時占士真係名副其實嘅「大帝」嘞！
紐約人早兩年已開始騰出薪金空間，為今夏搶奪占士作好準備。紐約人最大優勢係除咗羅致占士外，仲夠空間羅致多一名超級巨星，以扶助「大帝」登基。