大帝心淡告別騎士？
縱然「大帝」勒邦占士在生死戰打出「三雙」27分、19個籃板及10次助攻，可惜佢亦造出多達9次失誤，加上其餘隊友幫唔到手，結果占士單天難保至尊，騎士作客終以85比94不敵塞爾特人，「綠衫軍」塞爾特人總成績贏4比2進身東岸決賽。勒邦占士再度與總冠軍無緣，求變事在必行，也許今場已是「大帝」騎士生涯嘅告別戰！
飽受手肘傷患困擾嘅占士，尋日表現略為回勇，可惜騎士進攻模式始終太集中喺「大帝之手」，經常要佢強行剷籃，令佢打得特別吃力，亦因而出現較多失誤。騎士在第四節一度追近74比78，可惜往後4分鐘內竟全部「炒粉」，一下子被「綠衫軍」拋開至14分，間接宣判騎士死刑，最終塞爾特人贏94比85，近三季第二度在季後賽淘汰騎士，並事隔一季後再闖入東岸決賽。
騎士老毛病又發作，除占士外，其餘隊友都打唔出水準，占美臣全場10射2中僅得5分、奧尼爾受犯規過多影響僅上陣24分鐘得11分，至於莫威廉士雖有22分進帳，但防守力弱再度暴露人前，繼續睇唔實大勇嘅朗度，讓朗度取得21分及12次助攻。
教練米克布朗唔夠班
占士賽後表示：「塞爾特人在今個系列賽表現好好，有一套好完善嘅部署計劃，執行力亦強，呢方面我哋明顯唔及對手。我依家未知道自己嘅去向，但無論如何，已證明騎士未夠好，球隊需要認真尋求辦法去提升實力。」
的而且確，唔少美國傳媒都認為騎士教練米克布朗未夠班，騎士在季後賽嘅應變力明顯較差。由於占士有權選擇在今夏以自由身離隊，估計佢大有可能離開騎士。
■本報綜合報道