高比做打爵英雄
首圈備受抨擊嘅高比拜仁次圈回勇，尋日在主場出戰爵士，高比仔最後4分鐘攻入關鍵11分，協助湖人以104比99贏波先拔頭籌。高比仔全場19射12中，投射命中率高達六成以上，屬今季季後賽手感最好嘅一役。
首圈對雷霆驚險晉級嘅湖人，休息唔夠四十小時就要出戰西岸次圈比賽，但無損「紫金兵團」嘅表現，湖人藉主場氣勢首節領先7分，前三節亦一直保持優勢。不過第四節卻出現些微暗湧，爵士一度反超前4分，幸好高比拜仁及時挺身而出，最後4分鐘內攻入11分，協助湖人有驚無險地以104比99贏波。
鷹隊連贏3場氣走公鹿
高比拜仁今場手感極佳，19次起手中12球得31分，而罰球亦7射全中。至於上回贏波功臣加素亦有好表現，獲得「雙雙」25分及12個籃板，另有5次封阻。高比仔賽後表示：「我哋挖咗個洞畀自己踩，一度讓對方打起氣勢，所以我必須挺身而出，阻止敵人發難！」湖人贏波後總成績領先1比0，第二戰將在明早舉行。
另一邊廂，首圈最後一個晉級席位亦有結果，鷹隊在第七回合以95比74擊敗公鹿，總成績落後1比3下連追三場，驚險地以4比3反勝出線，次圈將對以逸待勞嘅魔術。慘遭淘汰嘅公鹿主將迪芬奴賽後表示，希望下季可以「夫添」打季後賽，因為今季實在有太多主力因傷缺陣，大大影響實力。
本報綜合報道