小牛遇刺悲情出局
被評為最有力挑戰湖人，搶奪西岸盟主之位嘅小牛，再一次在季後賽首圈悲情出局！小牛尋日作客聖安東尼奧，再度受制於馬刺嚴密防守，結果以87比97輸波，總成績輸2比4，近四季季後賽三次首圈出局。今季繼續大灑金錢嘅小牛班主古班對出局大表失望，而主將魯域斯基更透露，為了冠軍指環，下季或忍痛離開小牛。
今場背城借一嘅小牛，開賽後已受制於馬刺嘅嚴密防守，首節18次起手僅入4球得8分，早段已大幅落後十多分。雖然小牛在下半場稍為好轉，但可惜早段實在落後太多，加上最後40餘秒，小將比奧寶斯失誤被馬刺連奪4分拋離分數，最終馬刺有驚無險贏97比87，總成績4比2出線，報回上季遭小牛淘汰之辱。
小牛都算係NBA悲情球隊，近四季季後賽三次首圈出局，其中○七年以頭號種子身份，遭「老八」勇士淘汰，估唔到今季咁辛苦奪得西岸常規賽「二哥」，但就被七號種子馬刺踢走。今次亦係自○三年將首圈改制成七場四勝後，首次有七號種子淘汰「二哥」。
古班向球迷耍冧
為了奪得總冠軍，小牛班主古班不惜大灑金錢，就算球隊薪酬限額超出三千萬美元要交「奢侈稅」，轉會限期前仍從巫師引入卡朗畢拿，估唔到都係徒勞無功，佢賽後失望表示：「十年來都唔可以為球隊帶來錦標，實在要向球迷道歉。」至於再一次被指「孭唔到飛」嘅魯域斯基，出局後透露會認真考慮前景，呢位前常規賽MVP今夏可選擇自由轉會，為了追逐冠軍夢，有可能離開効力十二載嘅小牛。
■本報綜合報道