西岸勁旅金塊明早返回主場再戰爵士，因金塊已經落後到一比三，今場必須贏波先可以保住出線希望。不過，金塊賽前卻有不少球員出面抱怨隊友，領袖安東尼話冇人幫到手，而JR史密夫就責怪隊友自私，咁唔團結點贏波，今場續捧爵士下盤。（廣東體育周四早上10時30分直播）
因場數落後一比三，金塊球員難免信心動搖，球員賽前接受訪問時，亦明顯失去鬥志，紛紛抱怨隊友，JR史密夫表示：「當有球員打法自私時，就會因為自私而輸波。」事實上史密夫嘅言論亦非冇道理，金塊上場賽事總失誤達到18次之多，但全隊助攻次數僅得13次，可謂毫無合作性可言。
至於領袖安東尼則指出頭四場比賽都缺乏隊友支援，佢認為球隊想喺「生死戰」贏波，隊友一定要幫到手，分擔佢各項責任。但無論如何，現時金塊士氣已非常低沉，教練卡爾又因病無法領軍，相信好大機會於聽日提早畢業。