太陽追殺殘兵拓荒者

禍不單行！拓荒者尋日出戰第三回合時，開賽不久再有小前鋒巴頓傷肩離場，再多一名主力加入「十字軍」，球隊最終亦不敵太陽，總成績落後１比２。由於巴頓傷勢未明，拓荒者在續缺多名主力下，預計明日凌晨主場出擊都佔唔到甜頭，第四戰要撐客隊太陽。（有線165台及足球台61周日凌晨４時30分直播）

巴頓傷埋人腳更單薄

拓荒者今季認真慘情，常規賽早已有兩大中鋒比沙比拉及奧登重傷收咧，而季後賽前又收到不利消息，領袖萊爾要開刀做手術，估唔到另一正選巴頓昨仗落場十分鐘就撞傷肩膀要提早離場，第四戰大有機會缺陣。

拓荒者原有人腳已非常單薄，論整體實力的確不及太陽。再者，太陽嘅快速打法將令殘兵嘅拓荒者更加疲於奔命，相信今場都係太陽嘅天下。