馬刺炒湖人殺入季後賽

馬刺季尾全面復甦，雖然今場續缺受傷嘅柏加，但真路比利及鄧肯分別交出好表現，前者面對即將成為NBA打工皇帝嘅高比拜仁交出32分、5次助攻及5個籃板，而老將鄧肯亦貢獻「雙雙」24分及11個籃板球，均是今場贏波功臣。西岸一哥湖人近期表現極為鬆散，今場賽事已經係「紫金兵團」近六場常規賽第四次輸波，而高比拜仁自從獲得巨額續約後，近兩戰47射13中，僅得27.6%命中率，薪酬與表現完全唔成正比。而湖人輸波後，騎士正式鎖定成為常規賽冠軍。

尼爾遜平最多勝仗紀錄

馬刺贏波後亦成功連續13季打入季後賽，屬當今聯盟之冠，而球隊只要在餘下六場常規賽中再贏三場，亦可連續11季獲得50勝。馬刺向來擅打季後賽，而球隊近期亦狀態回勇，只要柏加傷愈復出，絕對有力爭奪今季總冠軍寶座。

同日勇士以113比112險勝速龍，勇士教練尼爾遜成功追平韋健士（Lenny Wilkens）1332場執教最多勝仗紀錄，尼爾遜只要再贏一仗就能成為史上最多勝仗教頭。