呂志興兼職踢波自得其樂
威廉、康廉相繼離隊後，為大埔從丙組踢到甲組的球員買少見少，造型甚似《女王辦公室》內吳卓羲的呂志興是其中一個。能夠披上大埔10號球衣，阿興早被隊友認定為好波之人，可惜基於現實關係，多年來只能兼職踢波，未能全力發展足球事業。不過阿興冇後悔，至少現時收兩份糧，羨慕死人。
老細體諒 多番遷就
「我老細都係踢波識㗎，當年讀完中五冇嘢做，佢叫我去公司幫手做船務跟單，咪試吓囉，一做就做到依家。我都覺得自己好幸運，因為老細鍾意踢波，所以好體諒我做球員，知道我要練波同比賽，都畀我去。依家正職都發展得唔錯，收入穩定之餘又可以繼續踢甲組。」
阿興少年時代踢過港青，亦打過流浪青年軍，之後就加盟大埔，所以在本地球壇名氣不算大，猶幸在大埔卻有不少粉絲，皆因他與阿智都是土生土長的大埔人。
「好多隊友都係喺大埔波地認識，好似蘇康城、史健威同埋阿智，之後踢流浪青年軍就同盧均宜、林嘉緯等做隊友，踢波真係識到好多朋友，仲幫我搵到兩份工添，哈哈。」