陳旭智呂志興足可圓夢

記：記者　陳：陳旭智　呂：呂志興

記：亞協盃三戰得一分，成績較預期失望吧？

陳：的確有啲失望，因為本應有個好開始，作客芽龍聯搶得一分，可惜之後喺主場輸畀泰港，主場出戰反而先嚟緊張。至於上場作客越南，就預咗難踢。

記：現時有何對策？

陳：已經冇得再諗，往後踢法一定較進取，期望餘下兩場主場能夠贏波，爭取次名出線。

亞協盃快速埋牙多

記：好多人話大埔主場仲差過作客，究竟點解？

陳：因為我哋擅打穩守突擊，大場對我哋較為有利，所以無論喺大埔或者將軍澳球場，老實講發揮都唔及喺旺角同大球場咁好。

記：大埔第一次踢亞協盃，感覺如何？

呂：對我嚟講幾新鮮，唔計去大陸集訓，平時比賽完都係各自返屋企，今次搭飛機比賽，真係好有作客feel，不過新加坡都冇乜球迷，反而我哋仲多人。

記：咁亞協盃同本地波有咩分別？

呂：速度高囉，而且埋身肉搏比較激烈，每場波嘅碰撞次數多不勝數。

球員團結 齊歎BBQ盆菜

記：去外比賽時有冇周圍逛逛？

陳：都有呀，因為首場係搭夜機返港，所以比賽完都有行吓街買手信，試吓當地美食，但喺越南就因為第日早機，無緣遊覽。

記：今季有李威廉同祖利亞離隊，影響大嗎？

陳：兩位都係上季主力，一定有影響，不過球隊補充咗唔少國援，亦提升了黃炎堃等小將上一隊，所以實力得以保持。

呂：冇錯，我哋出名團結，無論國援定外援都打成一片，得閒就會一齊BBQ同食盆菜，團結就係大埔成功嘅主要因素，如果唔係點由大埔衝出亞洲呀！

後記：富善施丹，勁！

能夠訪問呂志興真的特別高興，因為他正是筆者中學時代的大埔波友，當年他常在石地場使出施丹轉身，因而有「富善施丹」的外號，幾堅，但他應該不知道的。上年看見他捧走足總盃，自己都非常感觸，大埔人總撐大埔人嘛！

陳旭智

年齡：26歲

位置：後衞

曾効力球隊：流浪、大埔聖約瑟

呂志興

年齡：26歲

位置：中場

曾効力球隊：流浪、大埔聖約瑟

圖／文：梁嘉輝