鳳凰城劏牛出線季後賽

A米着火傳因錢作怪

鳳凰城近況銳不可當，連埋今場擊敗公牛在內，自三月中開始連贏8場，當中有7場得分超過110分。鳳凰城三大得分點今場都交到貨，包括積遜李察遜攻入最高27分，另外「A米」史杜迪米亞及受背傷困擾嘅拿殊則分別貢獻21及22分，其中「A米」搶得11個籃板球獲得「雙雙」。

鳳凰城戰績冒升，史杜迪米亞絕對功不可沒，皆因呢位大前鋒近8場有6場係隊中得分最高，但就有傳媒質疑佢表現咁好，只因為薪酬而戰，因為鳳凰城並唔願意提出頂薪留住「A米」，後者極大機會喺下季離隊。

公牛輸波後繼續排東岸第九，落後速龍1場半，餘下8場常規賽要盡量贏波，先有機會趕上尾班車。