金塊砸蜂安東尼喪搶籃板

【本報綜合報道】縱然有教練卡爾因治療癌病缺席領軍,但金塊尋日依然保持水準,主將「小甜瓜」安東尼攻入26分及搶下職業生涯新高嘅18個籃板球,加上「鳥人」基斯安達臣傷愈復出亦搶得13個籃板球,金塊得以喺主場輕勝黃蜂93比80。

金塊教練卡爾自從一個月前驗出患上咽喉癌後,要定時接受治療,所以尋日已經係卡爾第六次因病缺席領軍,據悉卡爾現時身體狀況唔算太好,所以早前對巫師賽後,亦冇接受任何訪問。

不過,金塊一班球員冇令卡爾呢位老人家擔心,由於黃蜂繼續缺少基斯保羅及史杜積高域兩員大將,所以金塊開賽後都打得非常輕鬆,上半場過後已領先25分,而金塊早早奠下贏波基礎後,下半場亦讓JR史密夫及安東尼卡達等後備落場攞分,最終只贏13分。

波神「養貓」:夢想成真

安東尼今場搶下職業生涯新高嘅18個籃板球,佢賽後表示:「我本來目標係搶20個籃板㗎,因為我知道連尼要頂住奧卡科及大衞韋斯等球員,所以係時候到我表演搶板!」金塊贏波後總成績為47勝22負,繼續在西北區領放。

另方面,「波神」米高佐敦正式入主山貓後,尋日亦召開記者招待會,佐敦話擁有山貓係夢想成真,依家已經將山貓擺喺人生第一位!