周一凌晨上演嘅東岸大戰，騎士憑「大帝」勒邦占士獨取30分，主場輕鬆以104比93擊敗○八年總冠軍塞爾特人，睇嚟兩隊即使喺季後賽再度碰頭，塞爾特人都難阻「大帝」登基！
「綠軍」塞爾特人被視為東岸最有實力挑戰騎士嘅球隊之一，但今季表現未如理想，即使「3條煙」加納特、雷阿倫及皮雅斯今場均有上陣，但拍落騎士依然唔夠班。雖然勒邦占士在比賽期間唔小心畀加納特插親隻眼，差些做「盲公」，但佢下半場一發力，即刻將紀錄拉開，全場取得30分、7次助攻、8個籃板球及3次封阻嘅「神級」統計！
最能夠體現塞爾特人走下坡嘅人，必然係騎士後備大前鋒鮑維，佢曾協助塞爾特人奪得總冠軍，佢承認塞爾特人真係退步咗好多：「可能佢哋真係年紀大咗，你睇得出佢哋嘅防守慢咗好多，而且射波亦冇以前咁得心應手，我相信如果我哋喺季後賽碰頭嘅話，晉級嘅一定係騎士。」
