艾殊利高爾嘅「偷食」事件愈揭愈臭，英國《太陽報》踢爆上年七月隨同車路士去美國西雅圖踢熱身賽期間，同當地一名女子大搞一夜情，另外又被網民踢爆同一位利物浦秘書有染，性醜聞累積到第四單。另一邊廂A高嫂Cheryl高調反擊，公開拖俊男去街，而車仔班主阿布拉莫域更重扣佢兩周薪酬，加上新近入選為全英最乞人憎人物榜首，令呢位賤男面臨形象、家庭和事業三失，隨時一鋪清袋。
第1失：形象插水 全英最乞人憎升上榜首
全英5大最乞人憎男士
1 艾殊利高爾 （足球員）
2 泰利 （足球員）
3 穆哈傑爾 （恐怖分子）
4 活士 （高爾夫球員）
5 米高卡路 （樂透彩暴發戶）
第2失：老婆離棄 Cheryl拖仔高調反擊
A高嫂Cheryl日前去洛杉磯工作，喺情人節約會英俊電視男星睇戲同食燭光晚餐，呢位男星係二十四歲嘅瑞克，係一位舞蹈員，並曾經贏得拉丁舞世界冠軍，係典型白馬王子。雖然未知A高嫂今次係咪嚟真，但呢個敏感時候老婆傳出啲咁嘅緋聞，A高睇嚟有排都瞓唔着。
第3失：老細詐型 阿布震怒扣薪240萬
另A高早前被爆喺賽前違規帶情婦入球隊下榻嘅酒店鬼混，令車路士班主阿布拉莫域大發雷霆，決定重罰佢兩周薪酬合共二十萬鎊（約二百四十萬港元）。據聞阿布對於泰利之前搭上布歷治前女友已經好不滿，但泰利並冇違反隊規，所以冇受罰，今次將怒火一次過發洩喺A高身上。領隊安察洛堤亦同球員開會，希望佢哋潔身自愛，否則激嬲老闆，神仙都保佢哋唔住。
■本報綜合報道