這是今季暫時最爆嘅球員交易，巫師「三換四」決定放走前鋒卡朗畢拿、中鋒希活及後衞史堤芬遜共三人，以換入四名小牛球員，包括前鋒祖殊侯活、古頓、辛高頓及昆頓羅斯。其實卡朗畢拿同希活本身係巫師主力，但仍然被放棄，會長格倫菲特都話迫於無奈：「我哋對今季成績好失望，希望透過交易帶來新衝擊。」

再者，巫師所得四名球員當中，祖殊侯活、古頓同辛高頓都會喺今夏約滿，到時佢哋離隊會令巫師可以騰出薪酬空間，夏天可望重新簽入另一班球員再戰江湖。至於小牛得到曾經打過明星賽嘅卡朗畢拿後，奪標機會大增，難怪班主古班興奮到極：「今次交易之後，小牛實力明顯增強！」

騎士力斟史杜迪米亞

至於另一總冠軍大熱騎士，將有機會得到太陽中鋒史杜迪米亞，條件係要放走中鋒伊高斯卡斯、小將希臣及一個首輪選秀權。一旦事成，史杜迪米亞拍住勒邦占士，再加上奧尼爾，將令騎士爭標之路如虎添翼。