本文重點
聽日明星賽將會一口氣上演五項活動，包括H.O.R.S.E投籃賽、混合投籃賽、技巧挑戰賽、三分賽及最受矚目嘅入樽賽（now 671周日上午９時30分起直播）。雖然「大帝」勒邦占士今屆甩底入樽賽，但其實參賽陣容絕不遜色，皆因有人氣爆燈嘅湖人後衞沙朗布朗首度登場，呢位「彈弓人」今季喺網上Hit爆，佢嘅入樽短片點擊率高企，所以球迷均極度期待佢嘅演出。
尼特羅賓遜力爭三冠王
首度獲邀參加入樽賽嘅沙朗布朗，自從上季由山貓轉投湖人，出鏡次數較以往多後，隨即憑入樽令球迷留下深刻印象，唔少網民都將佢嘅入樽短片放上YouTube，結果短短時間已經獲得數十萬點擊率，成為網絡紅人。沙朗布朗最令人吃驚嘅係佢驚人嘅彈跳力及騰空力，身高僅六呎四吋但卻憑彈跳力阻擋不少「高佬」投籃，其中上年封阻韋斯，就成為ＮＢＡ經典片段之一。
至於其餘參賽者就分別有○二年入樽賽亞軍謝勒華萊士、兩屆入樽賽冠軍尼特羅賓遜，若尼特能衞冕成功，就會成為ＮＢＡ史上首位三奪入樽賽嘅球員，而最後一個名額就由快艇嘅艾歷哥頓及速龍嘅迪羅辛在新秀對抗賽中場時ＰＫ，以決出參賽資格。