春節臨近，不少學校都會組團在年宵市場擺檔，讓學生們可走出校園，一嘗自己做「老闆」的滋味，並從中吸取社會經驗！近日筆者打開Facebook，都會見到不少學界運動員都有份做老闆，當中就讀新法書院的香港女排代表隊成員「6呎高妹」劉嘉敏，就利用其絕佳人緣，聯同其他同學仔透過Facebook群組竟號召超過三千好友力撐，認真有生意頭腦！
夾五百蚊做小股東
這個在Facebook熱爆的「今晚買老虎！新法書院2010年花墟年宵」活動群組，由新法書院的一班賣年宵的中六學生發起，而獲邀請的好友名單合共超過三千人，部分更留言話一定「幫襯」支持，可謂未開檔，聲勢已經贏晒。
今屆協助新法在「全港學界精英排球比賽」中歷史性獲得亞軍的Carman劉嘉敏，亦是這班中六學生之一，這位東亞運香港代表隊成員坦言搞今次年宵攤檔十分有驚喜：「以前讀嘅學校都無啲咁嘅嘢，估唔到新法呢間學校為咗學生能夠攞多啲社會經驗，竟然肯無條件畀四萬蚊出嚟幫我們租攤檔，而其他設計、搵貨、入貨、銷售策略、以及入貨嘅錢就交由學生負責同攤分。我自己就夾咗五百蚊做小股東、同埋每日放學後都落去檔口幫手，希望學到多啲嘢啦！」
自家製精品唔憂賣
雖然連日來的壞天氣令生意額未如理想，但Carman就對「今晚買老虎」這檔生意抱有信心：「我哋會將25％收益捐去公益金，所以我相信做善事一定會有好報。另外，我哋賣嘅同甘共『虎』情侶帽、發光海派甜心、披虎皮的北極熊、同埋自家設計嘅虎仔餅咕
，件件都咁得意，相信食住情人節個勢頭，一定有好多女仔叫佢男朋友買番個畀佢，所以唔擔心會蝕本㗎！」
賀歲5寶即日上架
虎仔餅咕$128
披虎皮的北極熊 $50
老虎錘仔 $35
發光海派甜心 $88
同甘共虎情侶帽 $120/對
圖、文：司徒子文、Carrie、Kin