【本報綜合報道】塞爾特人昨日罕有地齊集「三巨頭」出戰，但卻喺東岸大戰主場89比96不敵魔術。塞爾特人輸波關鍵係第三節，班球員突然「發波瘟」，畀魔術打出一段19比0嘅攻勢，埋下輸波伏線。

「綠軍」塞爾特人今季長期受傷患困擾，「三巨頭」加納特、皮雅斯及雷阿倫甚少同一時間上陣，隨着皮雅斯今仗傷愈復出，「綠軍」夫添出戰卻輸波收場，全隊投射命中率僅四成二，冇一位球員得分過二十分。「三巨頭」都表現麻麻，睇嚟要夾番一排先可以催谷到狀態。

單節大勝25分

今場表現最出色嘅係魔術「老飛人」卡特，佢取得全場最高二十分，包括三分波四投三中，而且喺魔術打出嘅19比0攻勢之中，為球隊貢獻九分。

兩日前，魔術喺領先二十一分嘅情況下，畀巫師喺第三節絕地反擊，追番二十二分，最終以一分飲恨，估唔到兩日後，魔術以牙還牙，單計第三節大勝塞爾特人二十五分。

魔術教練雲根迪表示：「籃球就係咁神奇，兩日前我見證住球隊打出最差勁嘅第三節，估唔到今次我哋卻打出第三節嘅代表作！」