巫師落後21分翻盤

上季東岸冠軍魔術喺主場面對陣容不整嘅巫師，確實冇輸波理由，而球隊開賽後亦展現霸氣，上半場已一度拋開21分之多。可惜拉開優勢嘅魔術下半場防守懶散，單係第三節已被巫師追回超過20分嘅距離，最終巫師憑卡朗畢拿射入絕殺球，以92比91反勝。

反勝功臣卡朗畢拿獲得全場最高31分，而魔術嘅「飛人」卡特賽後亦投降：「當佢準備射最後一擊時，我已經設法Mark佢，仲擋住佢塊面添，但結果都係畀佢射入。」至於魔術教練雲根迪就對球隊表現大為不滿：「老實講，今場我哋係抵輸嘅，第三節時球員好似完全唔識防守，我對佢哋嘅態度感到非常失望。」

另方面，今年明星賽三分大賽名單已出爐，兩位星級球員塞爾特人嘅皮雅斯及金塊後衞比立斯，將會挑戰衞冕嘅熱火射手曲克，而其餘參賽者為勇士嘅史堤芬居里、太陽嘅菲爾及紐約人嘅加連拿利。