太陽係聯盟中平均得分最高嘅球隊，當佢哋狀態好嘅時候，可將小球戰術發揮得淋漓盡致，但近期球隊嘅狀態明顯下滑，近七場輸五場，美國傳媒更爆料，指主將史杜迪米亞同教練根特利喺更衣室內炒大鑊，有報道指僅餘一年約嘅史杜迪米亞，可能會被交易到其他球隊。

巴布沙長抖添暗湧

太陽另一隱憂，係得分力甚強嘅巴布沙因傷要休戰一個月。曾奪得○六至○七年最佳第六人嘅巴布沙，係太陽板櫈主力得分點，佢嘅缺陣大大加重咗正選球員嘅負擔，令球隊陷入低潮。

至於爵士經過季初嘅黑暗期後，近期愈打愈好，近七仗贏咗六場，當中更包括騎士、馬刺同熱火等強隊，尋日輕輕鬆鬆主場大勝籃網一一六比八十三，下半場已成垃圾時間，令布沙及迪倫威廉士等主力可得到充分休息，今仗主場對太陽相信可再下一城。