騎士昨日憑第三控衞吉遜射入關鍵三分，加上「大帝」勒邦占士繼續有神勇演出，主場以一百比九十九險勝雷霆，只要有「大帝」壓陣，騎士所向披靡，冇咗兩個控衞又點？
吉遜入關鍵3分波
騎士兩名控衞莫威廉士及韋斯均因傷缺陣，長坐冷板嘅吉遜，終於有機會兩年多以來首次打正選，而佢昨日亦成為贏波嘅功臣，喺完場前8.7秒射入絕殺三分波，為球隊奠下勝局。
不過，今場表現最Sharp醒嘅，當然係攞咗三十七分勒邦占士，佢貢獻九個籃板及十二次助攻，差啲就食出大三元，而且當完場前零點九秒嘅時候，勒邦占士成功封阻對方球員杜蘭特嘅投射，令騎士最終險勝一分。
完場前封阻杜蘭特
雷霆主將杜蘭特今季平均得二十九點二分，喺射手榜排第三，僅次於勒邦占士同安東尼，不過呢位後生仔嘅火候始終差啲，喺關鍵時刻往往失手，繼早前對灰熊完場前射失三分波，今次又畀「大帝」封殺！
杜蘭特賽後表示：「我都唔知佢喺邊度走出來，當時我嘅集中力只顧住籃框，咁輸法真係冇計，我只能夠話自己年紀尚輕，仲可以不斷學習。」此外，騎士為咗補充後備力量，已同發展聯盟球員斯特歷積遜簽咗十日合約，作為吉遜嘅替補。 本報綜合報道