湖人損兵折將！尋日馬刺主場大勝湖人一○五比八十五，令湖人三年多來首嘗作客四連敗，帶傷上陣嘅高比拜仁更喺比賽末段背部受傷離場，連埋高比仔，現時湖人傷兵人數多達六人，連「禪師」積遜教練都冇晒符。

高比仔手指裂骨傷勢嚴重，近幾場都係頂硬上，令發揮大受影響，上仗對公鹿都係得十二分，起手廿一次僅中四球，今場亦僅得十六分，臨尾仲要傷埋背部，睇嚟要抖番排。高比仔賽後說：「我想每場比賽都上陣，但我真係好痛，尤其係射罰球嘅時候，簡直痛到嗌救命。」

半打傷兵 一哥難保

美國傳媒認為，高比仔喺季初搏得太盡，場場攞三、四十分，導致季中傷患纏身。今場高比仔所得嘅十六分都喺上半場取得，第三節開始已一路捱住打，但積遜教練要到第四節至忍唔住將佢換走。

現時湖人嘅傷兵多達六人，包括加素、阿堤斯、奧當、亞當摩利臣、胡查錫及高比仔，雖然依家湖人仍以廿九勝九負排緊聯盟第一位，但以目前情況，睇怕佢哋個「一哥」位都好快不保。