波鞋明志 占士去紐約？

前日占士生日，一眾騎士隊友已喺主場館同佢慶祝，老友華拿祖仲即場送咗份禮物畀「大帝」添，但原來出手最闊綽係「巨無霸」，今季先加盟騎士嘅奧尼爾得悉占士鍾情勞斯萊斯後，即時豪擲40萬美元買下一部○九年款勞斯萊斯Phantom VI，基於占士本身已坐擁一部黑色，所以奧尼爾就揀咗架白色嘅送畀占士，認真細心。

其實「大帝」向來都係超級車迷，佢十八歲讀高中時，已經獲得媽媽送贈座駕，其後獲得贊助商Nike合同後，隨即買下兩部愛車銀色平治及黑色勞斯萊斯，現時占士座駕數量已達到十四部之多！

縱然奧尼爾出動厚禮，但兩人下季似乎都難續隊友緣，皆因日前占士新波鞋款式在網上曝光，設計師在鞋底位置竟加上「I LOVE NY」嘅圖案，只係LOVE字改為大帝嘅設計圖像而已，「波鞋」明志，唔通「大帝」去紐約人嘅心意已決？

本報綜合報道