【本報綜合報道】「玻璃人」麥基迪有樣學樣，尋日向火箭提出交易要求，結果雙方達成協議，火箭將為佢尋求交易可能，而「T-Mac」亦似早前嘅艾佛遜一樣，將無限期放假唔使歸隊。
復出經過六場「屈辱」比賽後，麥基迪主動要求提出交易，根據多個傳媒報道，火箭班主莫利、教練阿杜文及麥基迪其中一個經理人泰林已達成協議，火箭會在2月19日交易截止前盡量尋求方法換走麥基迪，期間「T-Mac」可以無限期離隊，十足十早前出走灰熊嘅艾佛遜。
麥基迪復出後六場平均只上陣7.7分鐘，令佢好不滿，亦成為今次事件導火線。雖然火箭已表明無意買斷麥基迪2300萬美元年薪嘅合約，不過球隊唔會倉卒作交易決定，因麥基迪合約明年屆滿，加上薪金由保險公司支付，所以火箭會慢慢揀目標人物，大不了季後先同佢分手。