公牛今季成績令人失望，美國傳媒最近就言之鑿鑿，話教練迪尼高帥位不穩，公牛高層可能搵前黃蜂教練拜恩史葛過檔，不過球員並冇受呢個負面消息影響，近期表現反而愈來愈好，明日公牛主場對溜馬，有力再下一城。

公牛今季人腳唔錯，後衞戴歷羅斯、中鋒諾亞同大前鋒鄧格都係可造之材，但至今成績僅得十一勝十七負，教練迪尼高表現完全唔合格，故傳出易帥消息，而季初執教黃蜂嘅前湖人名將拜恩史葛，就成為新教練大熱人選。

溜馬六連敗士氣差

不過公牛自傳出易帥後，似乎影響唔大，近五場取得三勝二負，前日勇挫黃蜂一仗，各主力都表現出色，後備上陣嘅特魯士湯馬士更獨取二十一分，表現搶鏡。

相比公牛，溜馬近期表現更加不濟，昨日輸畀熱火三十四分之多，比賽末段已進入垃圾時間，球隊連輸六場士氣跌落谷底，睇怕今場作客公牛都好難翻身。