撰文：黃兆崑、李芷韻
06年重返球圈嘅羅傑承，當年豪言要坐爆大球場，呢個願望喺10月21日嘅亞協盃４強次回合，南華對科威特ＳＣ之戰成為事實，封塵６年嘅大球場紅旗再度高掛，當晚入場人數接近三萬八千，最可惜係嗰場波南華輸○比一出局。
羅生喺今年嘅事迹仲有好多，上半年幫南華取得聯賽三連霸，建立新一代「南華王朝」，繼而再於今季盡攬本地精英，班費預算係破紀錄嘅三千萬港元，哄動球壇。
威水事全部關佢事
南華今季星光熠熠，８月初舉辦表演賽，對手係英超勁旅熱刺，南華最後贏二比○，同時間又同電視台合作，開拍電視電影宣傳本地波。香港隊方面，羅生喺８月底帶領香港隊喺東亞盃外圍賽淘汰北韓，取得東亞盃決賽周席位，喺12月嘅東亞運更以領隊身份帶領港足爆冷奪金，香港足球最威水嘅，樣樣都關佢事，故羅生成為今年「大騷王」真係實至名歸。
獎金之后趙詠賢
得獎作品：東亞運狂擸獎金事件
31歲的「壁球天后」趙詠賢在年底的東亞運動會上，共掛上3金1銀，其中在女單決賽力挫今年多次挫敗她的師妹歐詠芝一吐烏氣，最終趙詠賢不但成為整個東亞運的獎牌大贏家，更可袋走31萬2千港元的獎金，成為獎金之后。
篤波小天后吳安儀
得獎作品：四眼妹一鳴驚人事件
19歲的「四眼妹」吳安儀11月在印度舉行的女子世界業餘桌球錦標賽一鳴驚人，成為香港首位女子桌球世界冠軍，她在決賽以5比1擊敗澳洲球手帕拉舒，繼陳偉明及傅家俊後第3位贏得此項榮譽的本地球手。至於其偶像傅家俊今年亦創出歷史新高，世界排名一度登上第8位。
土產泳后韋漢娜
得獎作品：世大運創歷史事件
「土產鬼妹仔」飛魚韋漢娜今年7月在貝爾格萊德舉行的世界大學生運動會，為香港創下歷史新一頁，她先在女子100米自由泳力壓對手奪冠，繼而在女子100米蝶泳游出破大會紀錄的成績58秒24，掛上個人第二面金牌，在師姐蔡曉慧推薦下入讀美國柏克萊大學的韋漢娜，已確定目標游向倫敦奧運。
傳奇王陳肇麒
得獎作品：去英國浸鹹水事件
要數現役首席球星，相信非「陳七」陳肇麒莫屬，上季加盟南華後立即成為本地聯賽華人首席射手，今季名氣幾何級上升，跳出球圈框架，躋身名人行列。
今年8月在表演賽中射破熱刺大門，令他獲得到熱刺跟操機會，其後又與藝人李綺雯傳出緋聞，成為狗仔隊追蹤對象，而東亞運期間他從英國坐頭等機趕返香港踢決賽，後備入替幾分鐘就頂入關鍵扳平一球，最終助港隊奪金。本來只有在電影橋段才出現嘅傳奇，都在「陳七」身上發生，東亞運口號「創造傳奇一刻」，真係襯晒佢。
STEVEN王王史提芬
得獎作品：亞洲賽東亞運連贏事件
「BMX天王」王史提芬在今年10月全運會，雖因斷鏈而未能成功衞冕，但絕冇影響佢之後於首次喺港舉行的亞洲賽中嘅表現，實力超班的他最終贏得4連冠，繼續稱霸亞洲。至年底東亞運佢更以大熱姿態為港隊贏得東亞運第1金，贏盡風頭。
大騷王羅傑承
得獎作品：大球場扯紅旗事件
升呢王山度士
得獎作品：唔聲唔聲搭「車」事件
今年「升呢」呢句潮語大熱，而論09年升呢升得最犀利嘅，必選山度士（上圖左）。山度士於今年初由晨曦助教轉當主教練，期間球隊成績突飛猛進，短短4個月內協助球隊在聯賽盃過關斬將，在決賽憑互射12碼擊敗天水圍飛馬，為晨曦奪得3年來首項錦標。捧盃後山Sir急流勇退，但仍能當選年度最佳教練。
同安察洛堤做同事
山度士今年亦致力慈善工作，下半年女兒出世，榮升爸爸做老竇，而年底佢開設四年嘅「山度士足球訓練學校」突然大變身，同英超Big4車路士結盟，成為車仔足球學校嘅香港分校，與國際名教頭安察洛堤合作，人生踏入新階段。一年之內發圍兼起啤，邊個夠佢威。
金句王任煒雄
得獎作品：普高假波疑雲事件
以丙組實力進軍港甲嘅屯門普高，征戰期間，總監任煒雄卻因頻頻爆出「金句」而惹人注視，被封為「金句王」，而普高亦喺09年球壇鬧出連串事件，令港足頻頻上港聞，只可惜全部都係負面消息。
每次普高有事發生，任總都有「金句」出台，3月底聯賽普高以1:5大敗於愉園腳下，賽後前鋒張天德憤然退隊，暗示有隊友為錢打假波，引發軒然大波。
句句無厘頭真搞嘢
任煒雄在事件中頻頻爆金句，最經典係指張天德係「奧巴馬」同「摩西」，護級大戰擊敗淦源後，又說「應給青少年犯錯的機會，唔好一棍打死佢」，雖然廉署調查冇結果，普高繼續參賽，但卻陷入財困，至11月周轉困難，公司清盤，他又叫球圈中人「給我一百萬」，最終當然冇人騷佢，雖然球員願意唔出糧都照樣比賽，但普高卻因為冇錢為球員嘅勞工保險續保而宣布散班，而「任總」精警嘅金句亦成為回憶。
親善王周文亮
得獎作品：搵明星落區送暖事件
旺角場09年中封場重建，令甲組聯賽首次推行「主客制」，各隊落區各擁主場，而其中落區青衣嘅晨曦，會長周文亮（大B哥）就搖身一變成「親善王」，向區內長者送暖。
大B哥喺圈內圈外交遊廣闊，特別係同明星足球隊關係最密切，今季邀得譚校長譚詠麟主唱會歌《高低一起》，而美女港姐李珊珊以「球迷會召集人」身份號召，過時過節就拉隊落區，向長者送禮物玩遊戲，令球隊形象進一步提升。
王中王黃金寶
得獎作品：全運會三度掛金事件
香港「單車天王」黃金寶今年2月在丹麥首奪世界盃記分賽冠軍，用行動力證「高齡」並非成績障礙，這位36歲車神繼而再挑戰10月山東全運會，作為「四朝元老」嘅佢被委任為全運開幕禮火炬手之一，令港人也感自豪，而「愈踩愈有火」的黃金寶更在個人公路賽上與70多位車手力拚5小時後，最終力壓解放軍車手奪冠，繼97及01年後，第3次掛上全運金牌。
扶持後輩無私奉獻
不過，阿寶創造傳奇的使命並沒有停下來，在年底的香港東亞運動會上，他再次發揮無私精神，協助師弟突圍，最終3位師弟鄧宏業、楊英瀚及郭灝霆不負阿寶的「鋪橋搭路」，包辦男子個人賽金、銀、銅牌，創下另一歷史。