占士必考慮中國市場

與洪祖杭相識於足球壇嘅Peter表示，早於上年已得悉好友有興趣收購騎士，因兩人不時都會踢吓衞生波，而佢亦不諱言上月已知道好友收購成功。喺ESPN有評述NBA嘅Peter認為：「收購一支NBA球隊，甚至較收購歐洲足球會難度更高，何況騎士係當今最頂尖嘅NBA球隊，今次洪祖杭能夠收購成功，可謂盡顯中港商人嘅地位。」

洪祖杭收購後，眼前最嚴峻一關就係明年如何留住「金蛋」勒邦占士，眾所周知占士明年有權選擇以自由身離開騎士，若然「大帝」離隊，騎士股價肯定急跌。不過Peter就認為洪祖杭入主，可以成為占士續約嘅一大籌碼，因為洪祖杭可以為騎士帶入中國市場，令騎士及占士在中國更受人注視，情況就如火箭一樣，「T-Mac」麥基迪在中國咁受歡迎，多少都係受姚明帶挈，所以占士去留，必會考慮中國市場。