艾佛遜回歸76人後，頭三戰都輸波而回，若然尋日再輸畀勇士，「AI」就會重蹈其新秀賽季覆轍，76人遭逢13連敗。不過艾佛遜冇讓歷史重演，今場改任最擅長嘅得分後衞果然回復水準，10次投射入7球，命中率高達七成下攻入20分，此外前鋒楊格亦貢獻全場最高嘅26分及14個籃板球。

布蘭特做後備有怨言

76人能夠大勝，教練艾迪佐敦應記一功，皆因佢今場改變後場搭檔，由新秀荷列堤當控衞，艾佛遜做番老本行負責得分，「AI」賽後表示：「教練畀我哋兩個拍檔，結果造出一個好理想嘅節奏，大家嘅配合愈見火花。」

不過，被貶為後備嘅布蘭特明顯不是味兒，佢賽後話連對手勇士嘅摩亞都可以正選上陣，佢實在唔能夠想像一個年薪近1,500萬美元嘅球員會作替補，擺明唔滿意教練安排佢打後備。

另方面，火箭嘅阿利沙早前對速龍時批㬹，被NBA判罰停賽一場，今日未能替火箭出戰活塞。