本文重點
【本報綜合報道】「大帝」勒邦占士尋日面對雷霆創下三項新高，其中包括轟入今季最高得分44分，結果助騎士以102比89贏波，取得兩連勝。今場占士發威但另一大牌奧尼爾就再度暗淡無光，難怪唔少美傳媒都狠批「巨無霸」應該盡快轉打替補，唔好阻住地球轉。
雷霆上季仲係著名嘅魚腩部隊，上季兩度遇上騎士，平均輸23分之多，但今季喺杜蘭特帶領之下，已經擺脫腥味，搖身一變成為有力爭入季後賽嘅球隊。所以騎士今場初段都打得甚為艱苦，上半場完結後更以5分落後，幸好雷霆最後一節表現跌Watt，最終被騎士拋離之下，以13分之差落敗。
贏雷霆巨無霸似路人
勒邦占士今場大演個人騷，全場29射16中，三分球8射5中，個人轟入44分，而呢三個項目，55%投射命中率、62.5%三分命中率及得分44分，全都係佢今個賽季新高，可見「大帝」今場真係弗到漏。相反中鋒奧尼爾就繼續冇料到，今場只係上陣18分鐘，僅得5分及6個籃板而已，表現愈見低沉，所以唔少美傳媒都撰文建議騎士，應該將奧尼爾貶為替補，因為佢上陣時間愈多，反而會拖累占士嘅發揮。