高比仔又做贏波功臣

星光熠熠嘅洛杉磯湖人，唔單止成績好，亦係NBA最搵錢嘅球隊，市價高達47億港元，第2、3位分別係紐約人同芝加哥公牛，證明大城市球隊始終係NBA嘅搖錢樹，值得留意係近年成績大躍進嘅波特蘭拓荒者，上季市值漲幅達10%，成各隊之冠，係現時NBA最有潛力嘅球隊，而喺中國有龐大市場嘅火箭則守住第6位。

講番尋日湖人場波，爵士喺半場本領先52:48，但湖人喺下半場大逆轉，高比拜仁第3節開始爆發，獨取13分，助球隊反超前2分。湖人喺第4節徹底摧毀對手，打出一段21:2嘅攻勢，令爵士喺第4節僅得6分，差啲打破28年前爵士單節得5分嘅最低得分紀錄。

湖人10連勝後，今季成績為17勝3負，但湖人頭21場波之中，有17場係主場賽事，呢個「先甜後苦」嘅賽程，是福是禍真係要遲吓至知喇！