今季NBA確有唔少名不見經傳嘅球員彈起，就好似公鹿嘅真寧斯，登陸NBA未夠半季已經大紅大紫，有膽量自然上到位。尋日就輪到勇士嘅艾利斯發惡，呢位射手上年因傷長抖，但近期突然「着火」，尋日面對溜馬轟入個人新高45分，近三仗第二次攞到「40+」，難怪被人稱為「艾佛遜二世」。

其實今季已經係艾利斯第五個NBA賽季，基於佢上季長時間養傷，先被人遺忘咗。艾利斯身高6呎3吋，論高度最適合就係打控衞，不過佢嘅打法及意識都較像一個SG，所以早年決意轉型，結果即成為勇士第一得分點，情況同「AI」艾佛遜甚為相似。

高度不足 以快取勝

艾利斯準繩嘅投射及快速入楔，彌補咗身高不足，所以由新秀賽季開始，艾利斯平均得分每季遞增（除上季因傷長抖外），○七年更拿下最佳進步球員獎。尋日佢對溜馬轟入個人新高45分，協助球隊下半場反勝126比107之外，今季平均得分亦去到24.4分，升上聯盟得分榜第九位。

此外，艾利斯當年選秀時，只能以第二輪四十位被勇士揀中，但如今已經係勇士最高薪酬，年薪達到1,100萬美元嘅球星，足證世界冇懷才不遇。

籃網鬥小牛冇運行

另一方面，籃網已決定委任球會總監雲迪維治為新教頭，並於聽朝首度執教鞭迎戰小牛，希望逃過史上最差開局污名。不過小牛今季大勇，尋日又有運地險勝76人，相信今場會追打落水狗，為籃網送上18連敗劣績。（廣東體育周四早上8時30分直播）

另外，禁藥女飛人鍾斯有意加盟WNBA，並隨聖安東尼奧銀星隊的助教訓練。