近幾日NBA最熱門話題，相信離唔開「答案」艾佛遜宣布退役，美國傳媒估計「答案」只係意氣用事，有機會喺短期內復出，其母會費城76人已率先表態，希望簽番呢位傳奇球星，但喺未有「答案」前，睇怕76人仲有排捱，明早作客小牛，只能夠輸少當贏！（中央5台及廣東體育周二早上9時30分直播）

「AI」艾佛遜宣布退役後，無論球迷、球圈中人都感到非常可惜，紛紛希望佢回心轉意，而「AI」嘅名字，亦先後同湖人、76人扯上關係，不過湖人已有高比拜仁、加素等主力，根本容納唔到艾佛遜，呢單新聞炒作成分較高，而76人則誠意可嘉，勝在感情分搭夠，故艾佛遜短期內復出絕非奇事。

魯域斯基馬利安當弗

講番明早場波，76人狀態相當低沉，今季成績為5勝11負，近五仗輸晒，兩名主力伊古達拿、布蘭特表現均未如理想，加上路易斯威廉士養傷八星期，要打入季後賽可謂困難重重。

受戰績低迷影響，現時76人入座率排聯盟倒數第二，就算艾佛遜回巢未必能令球隊起死回生，起碼都可成為票房保證，吸引多啲球迷入場先吖！

小牛尋日雖然輸畀騎士，不過佢哋今季成績非常平穩，至今仍未試過連輸兩場，主將魯域斯基今季平均取得27.1分，新加盟嘅小前鋒馬利安攻守兼備，亦好幫得手，所以明早主場對狀態低迷嘅76人，大有機會贏波反彈。