父為前法網盟主

身高六呎十一吋、惡形惡相嘅諾亞，其實系出於名門，佢爸爸係法國著名網球手、前法網盟主老諾亞，媽媽係瑞典小姐Cecilia Rhode，而爺爺就係一位前喀麥隆足球國腳，所以諾亞自然獲得優良遺傳，充斥運動細胞。不過小時候嘅諾亞，對打網球或者踢波都缺乏興趣，反而只鍾愛打籃球，但因為佢老竇名氣太大，所以細個喺街場打波時，就經常被人寸佢係二世祖。

因為高人一等，諾亞入讀佛羅里達大學後，已被召入大學籃球隊，與現時効力鷹隊嘅荷福特組成「雙塔」陣容。其後諾亞就參與咗07年NBA選秀會，當屆以第九位被公牛選中，經過兩季適應後，今年終於打起。

諾亞今季平均交出11.7個籃板球，曾經上過籃板王首位，現時則僅次於保殊、杜域侯活及謝勒華萊士。不過諾亞已被公牛球迷冠以「新籃板王」嘅稱號，全因佢打法與「小蟲」洛文非常相似，都係得分能力稍遜，但搶籃板就非常到家。不過以諾亞嘅資質，相信都無法打入美國「夢幻隊」㗎啦，所以佢早前就選擇咗加入法國國家隊（因諾亞同時擁有法國護照），同柏加並肩作戰打國際賽。

諾亞profile

Joakim Noah

所屬球會：公牛

位置：中鋒、大前鋒

國籍：法國、美國

年齡：24歲

身高：6呎11吋

今季平均數據：11.1分、11.7個籃板球