莫里斯威廉士三分波全中

勒邦占士今季每場得分超過29分，幾乎每次進攻都有佢份，尋日面對實力強勁嘅小牛，小牛刻意加強防守，希望封殺「大帝」，但呢個時候勒邦占士卻以大局為重，退居幕後造就其他隊友得分，可見勒邦占士一啲都唔會貪功，而且技術非常全面。

莫里斯威廉士尋日表現搶鏡，三分球起手七次全中，全場得25分，佢百發百中，全靠勒邦占士引開晒對方守衞，令莫里斯威廉士有更多時間及空間起手，係成場波嘅贏波關鍵。

「巨無霸」奧尼爾雖然僅得９分及取得６個籃板球，卻被傳媒讚佢表現漸入佳境，開始習慣喺騎士擔任綠葉角色。

至於小牛主將魯域斯基雖然取得全場最高嘅27分，但小牛大部分時間都畀騎士拉開分數，入唔到局。騎士贏波後，今季成績為12勝５負，排東岸第４。