相信唔少籃球專家季前都對火箭死晒心，姚明鐵定長抖，麥基迪復出無期，再加上阿堤斯離隊他投，剩番嘅人腳真係不堪入目，要爭入季後賽都難。但正所謂球隊有難，匹夫有責，一班廿歲出頭嘅「小火箭」都要出面擔大旗，結果如布魯克斯及阿利沙等都成功上位，火箭係時候同「姚麥」講拜拜。
身高僅得六呎嘅矮小後衞布魯克斯，今季擔正後火速成為火箭領袖，平均得分及助攻達到18.3分及5.9個，比起上季11.2分及3個助攻，數據大幅躍進。
至於新兵阿利沙，同樣估唔到可以咁快融入火箭，並趁「姚麥」養傷之際成為球隊一號得分點。其實佢上季已在湖人上位，喺總決賽中屢度做出關鍵偷球及投入三分球，今季嚟到火箭發揮空間更大，仲唔大打身價波咩！