本文重點
籃網黑過墨斗，今季開操唔知係咪冇拜神，隊波頭頭碰着黑，繼迪雲夏里士、易建聯、杜寧同葛利李爾先後受傷，前日更發現羅拔斯患上豬流感（H1N1甲型流感），要即刻隔離，而尋日籃網主場亦以76:86不敵塞爾特人，開季已經連輸七場，認真大鑊！
羅拔斯確診要隔離
籃網季初已經有四人受傷，包括頭號球星迪雲夏里士等三名正選，點知噩夢未醒，近幾仗表現最搶鏡嘅羅拔斯確認患上豬流感，全部球員都要接受檢查，幸好暫時冇隊友受感染。
籃網七戰七敗，係目前聯盟三十隊中，唯一未開齋嘅球隊，亦係球隊史上最差嘅開局成績，不過尋日對實力強勁嘅塞爾特人，喺陣容不整下已算交足功課。教練法蘭表示：「我哋得八個人替換，比賽末段難免體力不繼，但球員已盡咗力，我相信明天會更好。」