30/10/2009

播放本新聞相關短片

奧尼爾拖累騎士連敗

被譽為今季奪標熱門之一嘅騎士,想唔到開季接連受創!騎士尋日作客速龍,結果全場受制於「多倫多雙塔」巴格蘭尼及保殊,「巨無霸」奧尼爾交唔出水準,可憐「大帝」勒邦占士打出「三雙」一樣要輸波,速龍贏101比91,騎士開季兩連敗!

騎士今季搵嚟一代中鋒奧尼爾,目的就係要改善積弱多年嘅中鋒位,對抗擁有一流中鋒嘅魔術及湖人。可惜奧尼爾已年屆卅七,移動速度大幅減慢,而替補嘅伊高斯卡斯同樣一把年紀已經卅四歲,所以速龍今日就針對兩隻「大笨象」,「雙塔」不斷移動及遠射克制對手。

明早對木狼可開齋

○六年狀元巴格蘭尼向來都屬技術型中鋒,佢今場就非常聰明,多次針對奧尼爾或華拿祖等移動速度較慢而作出遠射,結果巴格蘭尼今場15投11中,攻入全場最高嘅28分,其中更射入兩記三分球,令騎士防不勝防。此外拍檔保殊亦攻入21分及16個籃板,速龍贏晒內線。

奧尼爾狀態一般,所以今場只係上陣25分鐘僅得12分,因此「大帝」又要孤軍作戰。「大帝」今場攻入23分,並交出12次助攻及11個籃板球,完成「三雙」數據,可惜球隊上半場實在落後太多,單天難保至尊,騎士最終以91比101不敵速龍,開咧兩連敗。

騎士聽朝就會打第三場比賽,作客實力較弱嘅木狼,木狼尋日亦打響頭炮,憑新秀費連絕殺成功,以95比93險勝籃網,易建聯攞到17分都於事無補。不過,木狼對住籃網先咁叻啫,遇上檔次高幾班嘅騎士,應該冇得發惡,預計騎士可以喺今場開齋!

(廣東體育周六早上8時直播)